Saida mak Linux?

Saida mak Linux ?

Maioria husi ita hotu kuaje Hatene ona Saida mak Windows, no Sitema Operativu refere kuaje ita hetan bainhira ita foin maka utilija Komputador. Husi ida ne'e dalabarak ita hanoin Sistema Operativu ba Komputador ne'e mak Windows ne'e deit ona, no ita nunka imajina sei iha tan sistema Operativu barak alem husi Windows, hanesan Linux ka MacOS.

Ne'e duni iha Publikasaun ba loron ohin nian, hakerek nain hakarak fahe konesimentu jeral deit konaba Linux, tamba kuaje iha ema barak mak seidauk hatene ka seidauk konese konaba Linux ne'e rasik . Nune'e espera Publikasaun ida ne'e interesante no bele fo netik konesimentu konaba Linux ba Le'e nain sira.

Saida mak Linux ?
Husi referensia ne'ebe tenik iha Wikipedia, Linux hanesan naran ida ne'ebe fo ba Sistema Operativo komputador ho tipoUnix. Linux mos hanesan exemplu ida husiDezenvolvimentu software livre no kodigo nakloke. Hanesan mos software livre sira seluk, kodigo husi linux permite ita atu bele halo Modifikasaun, Dezenvolve no Distribuisaun.
Bele le'e mos Komandu baziku CLI iha Linux (Terminal Linux)
Historia badak konaba Linux.
Naran “LINUX” foti husi naran kriador, ne'ebe fo kunhese ka Publika iha tinan 1991 husi Linus Trovals. Sistema no baje husi Linux jeralmente mai husi sistema operativo GNU ne'ebe fo publika sai iha tinan 1983 husi Richard Stallman.

Linus Trovals

Distribuisaun Linux (Distro Linux).

Dalabarak ita sempre rona konaba Ubuntu, Linux Mint sira ne'e, entaun hirak ne'e saida? Resposta klaru mak, hirak ne'e hanesan Distribuisaun Linux. Distribuisaun Linux ka babain ema temi dehan Distro Linux refere ba Sistema Operativu no Aplikasaun sira ne'ebe maka nia orijem ka Familia husi Unix ne'ebe utilija Kernel Linux.

Ezemplu husi Distro Linux ne'ebe konesidu hanesan: Ubuntu,Linux mint, Elementary OS,Fedora, Mandriva, OpenSUSE, Kali Linux, no distribuisaun sira seluk tan. No ita rasik mos la senti katak durante ne'e ita uja Sistema Operativu Telemovel ne'ebe maka nia orijinal husi Linux mos, maka Android.

Informasaun klaru konaba Distro Linux ka atu download Iso linux bele vizita iha nia sitiu ofisial iha https://distrowatch.com/
Iha mos Distribuisaun balun ne'ebe mak konsege dezenvolve sai boot no to'o ikus konsege kria tan distro derivasaun, ezemplu hanesan Distro Debian GNU/Linux. Distro refere konsege kria tan Distribuisaun barak hanesan Ubuntu, Knoppix, Xandros, DSL no seluk tan.

Husi esplikasaun simples ida ne'e karik bele ajuda Le'e nai sira hotu atu bele komprende oituan konaba saida mak Linux. No karik bainhira le'e hotu sei mosu tan duviida balun hanesan " Tamba sa Linux iha Distribuisaun Sistema Operativu ne'ebe barak", nune'e nia resposta simples maka tamba Linux ne'e Software Livre no Kodigu nakloke ba se deit bele Distribui, Dezenvolve ka Modifika tuir nesesidade.

No karik ejiste mos Distribuisaun Sistema Operativu balun ne'ebe maka Dezenvolve mos husi Timoroan ho naran Kafe OS ne'ebe dezenvolve husi ION Technology.
Bom ida ne'e mak Publikasaun simples ba loron ida ohin, espera bele iha benefisiu balun ne'ebe ita boot sira hetan bainhira lee hotu artigu ida ne'e. No hanesan bai-bain, karik iha Difikuldade ka Sujestaun ruma bele hato'o hela iha Koluna Komentariu. No ikus liu Obrigadu barak.